جب نہیں حضرتِ انساں پہ عیاں شانِ بتول (منقبت)

جب نہیں حضرت انساں پہ عیاں شانِ بتول

پھر بھلا کون قصیدہ کہے شایانِ بتول

ناطقے بند، زباں گنگ، تخیُّل خاموش

پا کے اللہ و محمد کو ثناء خوانِ بتول

افق فکر پہ ابھرا جونہی شمس مدحت

روح سے جسم میں ساری ہوا فیضانِ بتول

حمدِ معبود محمد کی ثناء ذکرِ علی

ہے ولایت سے مزین سبھی دیوانِ بتول

کیا کہا وارثِ احمد نہیں زہرا تو سنو

وسعتِ عالمِ امکاں ہے قلمدانِ بتول

متصل عرشِ خدا سے ہے مصلیٰ انکا

اور فردوس کا در ہے درِ دالان بتول

دھر کو کرتی ہے مشکاتِ ولایت سے عطا

نورِ توحیدِ خدا شمعِ شبستانِ بتول

لکھے جاتے ہیں ازل سے ہی بحکمِ خالق

نار و جنت کے قبالے تہہِ فرمانِ بتول

جاء نمازِ شہ صفدر پئے اسلام پناہ

کتنی وسعت ہے سمیٹے ہوئے دامانِ بتول

اس کے محور پہ تھے گردش میں قرون اولیٰ

ہے پرے سرحدِ ادراک سے دوران بتول

منزل خاک کہاں عرش کا افراز کہاں

بس یہ معلوم ہے پہنچے ہیں وہاں نانِ بتول

کارزارِ اسد اللہ تھے بدر و خیبر

اور دربارِ ستم گار ہے میدانِ بتول

دیکھ کر خطبہِ زہرا کے نرالے تیور

لحنِ آیات ہوا جاتا ہے قربانِ بتول

کن کی مختار نے حق کے لئے چکی پیسی

اللہ اللہ یہ ایقان یہ ایمانِ بتول

فرشِ خاکی ہو، لحد،  برزخ و دھر و جنت

سب مراتب میں عزا دار ہیں مہمانِ بتول

کیوں نہ عظمت میں ہو جنت کے برابر یہ زمین

کربلا ہے یہ یہاں دفن ہیں مرجانِ بتول

اس کو زیبا ہے کہے خود کو کنیزِ زہرا

جس کے کردار سے آتی رہے ریحانِ بتول

ان کے مہدی کے لئے راہ کو ہموار کرو

آج کے دور میں بس اتنا ہے ارمانِ بتول

اس حقیقت پہ ہے ایقان دل صائب کو

شاعران شہِ مظلوم ہیں خاصان بتول

۱۹ جمادی الاولیٰ ۱۴۴۰ ہجری