ستار عشق پر چھڑی ہے منقبت حسین کی(منقبت)

 

ستارِ عشق پر چھڑی ہے منقبت حسین کی

صبا سے آرہی ہے بوئے انسیت حسین کی

فرشتے دے رہے ہیں آج تہنیت حسین کی

ہے راہب اور حر کا یہ زبانِ حال سے بیاں

یہ فطرس اور وہب کی بیاں کرے ہے داستاں

ہے کیا نگاہِ کبریا میں منزلت حسین کی

 

وہی جو ہے حقیقتِ رسالتِ محمدی

جو عصمتِ بتول ہے جو ہے وقارِ حیدری

وہ نورِ لازوال ہی ہےاصلیت حسین کی

 

نگاہِ عشق میں نہیں ہے مال و زر کی کچھ بہا

متاعِ عشق فقر ہے متاعِ فقر ہے وفا

نمودِ شعلہِ وفا ہے شخصیت حسین کی

 

نقاق کی سیاہ شب، پٹکتی سر کو رہ گئی

طلوع روشنی ہوئی حقیقتوں کی صبح کی

غرورِ مصطفیٰ بنی ہے تمکنت حسین کی

 

صدا یہ گونجتی ہے نفسِ مطمئنّہ لوٹ آ

نہ جانے اب حسین کو خدا عطا کرے گا کیا

ہے کائنات تو ازل سے مملکت حسین کی

 

نہ فتح کر سکا کوئی نہ دخل دے سکا کوئی

بزورِ تیغ و مال و زر نہ اس کو لے سکا کوئی

قلوب پر ہے استوار سلطنت حسین کی

 

ہر  اک امام اپنی جا پہ پیشوائے دیں ہوا

ہر اک نے لاالہٰ کا سبق جہان کو دیا

مگر جدا ہر ایک سے ہے حیثیت حسین کی

 

کٹا کے سر حسین نے خدا کا دیں بچا لیا

بلند ہو کے نیزے پر جہان کو بتا دیا

خدا کے دیں کی منفعت ہے منفعت حسین کی

 

جوان نے علی کی تیغ کا عمل دکھا دیا

صغیر حرملا کا تیر کھا کے مسکرا دیا

کچھ اس طرح سے رنگ لائی تربیت حسین کی

 

درونِ سینہ جل اٹھیں چراغ مثلِ کوہِ طور

ہزار مشکلوں میں بھی نماز میں ملے سرور

اگر نصیب ہو بشر کو معرفت حسین کی

 

عروج صائب حقیر تر کا دیکھئے ذرا

غرورِ قیصری بھی میری ٹھوکروں میں آگیا

مجھے ملی نصیب سے ملازمت حسین کی

۲۷ مارچ ۲۰۱۹، ۲۵ رجب ۱۴۴۰، قم المقدس