دشمن زہرا جہنم کی غذا ہوجائے گا

قم مقدس میں جناب میرزا علی محمد صاحب کے دولت کدہ پر منعقدہ طرحی منقبتی محفل میں پڑھے گئے اشعار...

*دشمن زہرا جہنم کی غذا ہوجائے گا*

 

دل جو مصروف ثنائے فاطمہ ہوجائے گا

دیکھنا فرض تبرا خود ادا ہوجائے گا

 

آئیں گی زہرا طلب کرنے جو حق معبود سے

حشر کے.میدان میں محشر بپا ہوجائے گا

 

تاجور بھی اس قدموں میں سعادت پائیں گے

فاطمہ زہرا کے در کا جو گدا ہوجائے گا

 

کارزار عشق میں درمان زخم دل نہ ڈھونڈ

درد حد سے بڑھ گیا تو خود دوا ہوجائے گا

 

پھر عیاں ہونگی حدود کائنات فاطمہ

جب جہاں کا خشک و تر سب کچھ فنا ہوجائے گا

 

جب پکارے گا جہنم اے خدا ہل.من مزید

دشمن زہرا جہنم.کی غذا ہوجائے گا*

 

اس گھڑی ہوجائے گی پوری وعید حق کہ جب

دشمن زہرا جہنم.کی غذا ہوجائے گا*

 

مل گیا گر قبر کا تیری نشاں اے فاطمہ

میری خاطر منقبت کا یہ صلہ ہوجائے گا

 

معصیت کی راہ سے کترا کے دامن چل کے دیکھ

خودبخود تو بھی محب سیدہ ہوجائے گا

 

وہ سنے گا ادخلوھا اور سلاما کی ندا 

جو رہ زہرا میں اے صائب فنا ہوجائے گا

 

صائب جعفری 

قم مقدس ایران

Jan 13,2023 

7:53 PM

 

*پہلی تضمین ایک آدھ لفظ کے فرق سے محترم احمد شہریار کی تضمین سے ٹکراگئی تھی سو دوسرا تضمینی مصرع کہا...