خواہش فکر ہے بس جذبہ دل کی تالیف

خواہشِ فکر ہے بس جذبہِ دل کی تالیف

گو کہ گفتار ہے اسلاف سے حد درجہ ضعیف

سوزشِ عشق پکاری اے خدائے قاسمؑ

لفظ وہ دے کہ ادا جن سے ہو حقِّ توصیف

شکر کی جاء ہے کہ پوری یوں ہوئی میری دعا

عشق نے کردیا اک مطلعِ نو یوں تصنیف

مطلع دیگر

راہیِ جادہِ عرفاں جو ہوئی فکرِ لطیف

بہرِ قاسمؑ یوں ثناء خوان ہوا کلکِ شریف

نازشِ فرقِ عبادات، اطاعت میں حنیف

ضامنِ حرمتِ عبد اور وفا کی تشریف

حسن ڈھالا گیا قرآن کے سانچے میں ترا

حسنِ یوسفؑ میں کہاں تاب بنے تیرا حریف

مثلِ واللیل ہیں گیسو ترے، ابرو ہیں قدر

اور رخسار ہیں تشریح ِشفق باالتضعیف

چہرہ والشمس ہے اور چاہِ ذقن مثلِ قمر

چشمِ ضو بار ہے والنجم کی دیگر تالیف

مثلِ یاسین ضیاء بار تیری پیشانی

بر لبِ لعل ہے لولو سے لبو ں کی تعریف

سر  بسر نور کی تقریب کا حامل ہے بدن

یعنی طٰہٰ کا سرا پا ہے بغیر از تحریف

باخدا دونو ں میں تفریق کا امکاں بھی نہیں

حُسن کی بیت میں قاسمؑ ہے یوں اکبرؑ کی ردیف

یوں مشیت نے سنوارا ہے سراپا تیرا

حور بھی تیرے مقابل ہو تو لگتی ہے کثیف

ق

ہاشمی خوں کا اثر کرب و بلا میں یوں کھلا

حسن کر پایا نہ کچھ عزم و شجاعت کو خفیف

اک اچٹتی ہوئی ڈالی جو نظر بہرِ وغا

لشکرِ شام ہوا تنکا پئے بادِ شغیف

ارزقِ شامی با اولاد و ہمہ لشکر خویش

تیری صمصام کے آگے نظر آتا ہے نحیف

ربِّ کعبہ نے عطاکی وہ مسیحائی تجھے

فیض کا تیرے دم عیسیٰؑ نہ ہو پایا حریف

داد و تحسیں کا طلب گار  نہیں، جانتا ہوں 

بہرِ ترویجِ ثناء میرا ہے جبریل حلیف

نطق بےنطق مرا ضعفِ زباں دانی سے تھا

بس ترے نام کا صدقہ ہے ہوا ضعف، ضعیف

عالمِ یاس میں ہوں حال دگر ہے لیکن

مطمئن قلب ہے، وابستہ ہے تم سے تصریف

خوف کیا جب کہ ہے قاسمؑ سا میرا پشت پناہ

شوق سے وسوسہِ دل کرے کارِ تخویف

جب ہے منسوب یہ فدوی درِ قاسمؑ کے ساتھ

مشکلیں کیسے کریں اس کے ارادوں کو خفیف

ناطقے بند زباں دانوں کے کر دوں صائبؔ

اپنے انداز کا کر دوں جو قصیدہ تصنیف

۷ شعبان ۱۴۴۱

31/3/2020

 قم