دربدر یونہی بھٹکنے کی ضرورت کیا ہے(منقبت)
دربدر یونہی بھٹکنے کی ضرورت کیا ہے
پوچھئے سورہِ انساں سے سخاوت کیا ہے
یہ کھلا سجدہ زہرا سے حقیقت کیا ہے
عبد و معبود کے رشتے کی صداقت کیا ہے
کارِ توفیق نہیں حاصلِ توقیف ہے یہ
ہے عیاں آیہِ تطہیر سے عصمت کیا ہے
جو خدا چاہے وہ یہ چاہیں ، مشیت جو نہیں
پھر بتا دیجئے اور چیز مشیت کیاہے
در پہ زہرا کے فرشتوں کا نزول اپنی جگہ
خود سلامی ہیں نبی سوچئے حکمت کیا ہے
بعدِ احمد نہ اگر امِّ ابیہا ہوتیں
کون بتلاتا زمانے کو امامت کیا ہے
آگ، دربار، فدک اور درِ زہرا کی قسم
عرصہِ حشر بتا دے گا عدالت کیا ہے
آئینہ حق و شریعت کا ہیں زہرا، دیکھو
کیا امامت کی حمایت ہے اطاعت کیا ہے
ایک دو نعرے نہیں خوں کی طہارت پہ دلیل
خوں بتاتا ہے سرِ دار طہارت کیا ہے
ہے صدف اس کے لئے ملکہِ عصمت کا رمال
اب بھی یہ پوچھتے ہو اشک کی قیمت کیا ہے
دیکھئے صائبِ بے نطق کا دیواں تو کھلے
مہبطِ عشق پہ جو اتری وہ آیت کیا ہے
۱۶ مارچ ۲۰۱۷ء ، ۱۷ جمادی الآخر ۱۴۳۸ ھ
قم المقدس
