ہاشمی خوں کا دبدبہ زینب(منقبت)
ہاشمی خوں کا دبدبہ زینب
صولتِ دینِ مصطفیٰ زینب
نازشِ گلشنِ حیاء زینب
نکہتِ باغِ مرتضیٰ زینب
آپ ہی سے ہے ابتدائے وفا
آپ ہی پر ہے انتہاء زینب
قصرِ باطل میں کہنے حق کی اذاں
آگئیں بن کے فاطمہ ، زینب
مدعائے دل رسول، بتول
فاطمہ کا ہیں مدعا زینب
عفت و عصمت و شرافت میں
فاطمہ کا ہیں آئینہ زینب
زینتِ مصطفیِ ہیں شیرِ خدا
زینتِ شیرِ کبریا زینب
محوِ کرب و بلا ہے کل عالم
آپ میں محو کربلا زینب
شاملِ عزمِ شاہِ کرب و بلا
حاملِ کارِ انبیاء زینب
قوتِ قلبِ حضرتِ شبیر
بعدِ عباس بر ملا زینب
سر کیا تیغِ لحنِ حیدر سے
شام و کوفہ کا معرکہ زینب
شامِ کرب و بلا کو شام کے بعد
مطلعِ دین کر دیا زینب
استقامت پہ تیری بول اٹھے
شاہ و عباس مرحبا زینب
ہو کے زن تو نے ساری دنیا کو
درس مردانگی دیا زینب
بس یہی ہے حقیقتِ صائب
آپ کے در کا ہے گدا زینب
ــــــــــــــــ
صائب جعفری
ـــــــــــــــــــــــــ