نکہت ہے جذب عشق کی، قرطاس کی مہک(منقبت)

- منقبت

نکہت ہے جذبِ عشق کی قرطاس کی مہک

پیدا ہے لفظ لفظ سے احساس کی مہک

بحرِ ثنا میں رستہ بنانے لگا قلم

فکر و شعور پا گئے الیاس کی مہک

زینب کے دل کا آسرا، ڈھارس حسین کی

یعنی دعائے زہرا کے عکاس کی مہک

سیراب دستِ غازی نے جب سے کیا اسے

ر چ بس گئی فرات میں عباس کی مہک

صدیاں گذر گئی ہیں پہ تازہ ہے آج بھی

سینے میں علقمہ کے تری پیاس کی مہک

زربفت گل بھی  توڑ نہ پائے جسے کبھی

پندار ہے وفا کا ترے پاس کی مہک

تیرے علم سے آتی ہوئی خلد کی ہوا

کرتی ہے دور دل سے مرے یاس کی مہک

مثلِ فرات قبر کا تیری کروں طواف

عرضِ نیازِ شوق ہے اس آس کی مہک

بحرِ وفا سے پایا ہے گنجینہِ سخن

کیونکر قریب آئے گی افلاس کی مہک

لے جاوں گا بجائے عمل بہر احتساب

صائب نجف کے والی کے عکاس کی مہک

۱۵ جولائی ۲۰۱۲ کراچی