شیر خوار کربلا
Thursday, 9 January 2025، 03:01 PM
راہِ الفت کو اختیار کیا
پھول ہر زخم کو شمار کیا
غنچہِ شاہِ دیں نے کملا کر
ایک صحرا کو مرغزار کیا
تو نے اپنے لہو کی سرخی سے
حق کے جلووں کو تاب دار کیا
لے کے گردن پہ تیرِ سہ شعبہ
اپنے قاتل کو ہی شکار کیا
تو نے تقریرِ بے زبانی سے
حق و باطل کو آشکار کیا
نور نے تیری مسکراہٹ کے
پردہِ ظلم تار تار کیا
جس طرح شیر تاکتا ہے شکار
تیر کا تو نے انتظار کیا
ہنس کے توڑا غرورِ باطل کو
معجزہ تو نے شیر خوار کیا
شہ کے بے شیر کا کیا مدّاح
یہ کرم تو نے کردگار کیا
خونِ اصغر نے تیغ پر خوں کو
کامیابی سے ہمکنار کیا
الفتِ شیر خوار نے صائب
کتنے ذرّوں کو شاہکار کیا
2015
