پڑھتا ہے قصیدہ یوں قرآن خدیجہ کا(منقبت)
Monday, 3 June 2019، 12:08 AM
پڑھتا ہے قصیدہ یوں قرآن خدیجہ کا
اللہ قَدَر داں ہے ہر آن خدیجہ کا
آیاتِ الٰہی کی تنزیل کو خالق نے
چن رکھا تھا اوّل سے دالان خدیجہ کا
یہ کفوِ محمد ہے اور ضامنِ کوثر ہے
رتبہ کوئی کیا سمجھے انسان خدیجہ کا
دنیا نے تو جانا ہے زوجہ ہیں محمد کی
پر احمدِ مرسل ہیں ایمان خدیجہ کا
جانبازی ابوطالب کا طرّہ پئے دیں اور
ایثار و وفاداری عنوان خدیجہ کا
حقْا کہ ہوا بہرِ اسلام محمد پر
سب مال و متاع و زر قربان خدیجہ کا
ملکہ تھی عرب کی پر اک عشقِ محمد میں
فاقہ بھی رہا اکثر مہمان خدیجہ کا
زہرا ہوں کہ زینب ہوں حسنین تا مہدی ہوں
ہے دین پہ یہ سب کچھ احسان خدیجہ کا
معبود عطا کرنا ہم صائب و راحت کو
محشر میں پئے زہرا دیوان خدیجہ کا
۲ جون ۲۰۱۷
حافظ قرآن و نہج البلاغہ محترم راحت صاحب کی فرمائش پر یہ کلام لکھا تھا
19/06/03