عجیب سودا مرے سر میں جو سخاوت کا تھا (غزل بر وزن طبع زاد)

عجیب سودا مرے سر میں جو سخاوت کا تھا

کھلا یہ راز کہ خمیازہ سب محبت کا تھا

ــــــــــــــــــــــــــــ

جو نقدِ حضرتِ جاہل پہ میں رہا ہوں خاموش

اثر یہ علم و ہنر کا تھا اور شرافت کا تھا

ـــــــــــــــــــــــــــــــــــ

ہر ایک آن سفر میں رہا تخیُّل میرا

تو اس میں دخل بہت کچھ جنون و وحشت کا تھا

ــــــــــــــــــــــــــــــــــــــ

سیاہ آہیں نکلتی تھیں اس کے سینے سے یوں

چراغ مرثیہ خواں روشنی کی فرقت کا تھا

ــــــــــــــــــــــــــــــــــــــــــــــــ

ہوائیں لے اڑیں کیوں نام کی تمہارے نکہت

قصیدہ دوشِ ہوا پر مری حماقت کا تھا

ــــــــــــــــــــــــــــــــــــــــ

مجھے جو خوف رہا اس سے وہ تھی اس کی شوخی

اسے جو خوف رہا مجھ سے وہ دیانت کا تھا

ــــــــــــــــــــــــــــــــــ

نہ کام آئی دوا نے دعا ہمارے حق میں

نہ زور دل پہ ریاضت کا نے طبابت کا تھا

ـــــــــــــــــــــــــــــــــــــــــ

جو میرے کتبے پہ دستِ حنائی نے لکھّی ہے

تمام عمر اثر مجھ پہ اس عبارت کا تھا

ـــــــــــــــــــــــــــــــــــــ

جسے سمجھتا رہا میں نصیب اپنا صائب

وہ شناخسانہ کسی شخص کی حسادت کا تھا

ـــــــــــــــــــــــــــــــــــــــــــــــــــــ

۲۶ مارچ ۲۰۱۷

۶ فروردین ۱۳۹۶

۲۷ جمادی الاخر ۱۴۳۸

قم   ـــــــ ایران