جو نقش پہ حیدر کے چلتا نظر آتا ہے(منقبت)

منقبت

جو نقش پہ حیدر کے چلتا نظر آتا ہے

انساں وہ فرشتوں سے بالا نظر آتا  ہے

کعبہ سے جو لپٹا ہے حیدر کی عداوت میں

ساحل پہ کھڑا ہوکر پیاسا نظر آتا ہے

اوّل ہے جو خلقت میں افضل ہے جو خلقت سے

کچھ عقل کے اندھوں کو چوتھا نظر آتا ہے

لکھتا ہے جو حیدر کی مدحت تو قلم میرا

انوار کی بارش میں ڈوبا نظر آتا ہے

ہیں نفس خدا حیدر نفس نبی حیدر

یوں زیرِ نگیں عالم سارا نظر آتا ہے

جو شوقِ عبادت میں سوتا نہ تھا راتوں میں

وہ بسترِ احمد پر سویا نظر آتا ہے

پانی سے جو کھاتا تھا سوکھی ہوئی نانِ جو

خیبر کو اٹھائے وہ تنہا نظر آتا ہے

جلوت میں جو آقا ہے احرار جمیعت کا

محراب کی خلوت میں بندہ نظر آتا ہے

جنگاہ میں کھیتوں  میں سجادہ پہ منبر پر

اک عشق ہے جو ہر جا برپا نظر آتا ہے

ہر آئینہ جلوہ گر ہوں جس میں صفاتِ رب

حیدر کے سوا کوئی ایسا نظر آتا ہے؟

شاہانِ زمانہ کے قبضہ میں فقط ابدان

انفاس پہ حیدر کا قبضہ نظر آتا ہے

گیتی کی یہ وسعت اور افلاک کی پہنائی

دھوّن تیرے قدموں کا پھیلا نظر آتا ہے

آہنگ سے بلغ کے کھلتا ہے عجب نکتہ

اسلام ولایت میں سمٹا نظر آتا ہے

خوشیوں کے ترانے ہیں مومن کی لبوں پر اور

لب ہائے منافق پر نوحہ نظر آتا ہے

دل کیوں نہ جھکیں آخر سجدے میں عقیدت سے

ہاتھوں پہ محمد کے قبلہ نظر آتا ہے

قرآن کے پہلو میں قرآں ہو رکھا جیسے

پہلو میں یوں مولا کے مولا نظر آتا ہے

من کنت کے نغمے کی تاثیر ذرا دیکھو

جنت سے فزوں خم کا صحرا نظر آتا ہے

بخِِ کی صداوں سے معمور فضائیں ہیں

معمورہِ ہستی آسودہ نظر آتا ہے

تپتے ہوئے صحرا میں پالان کے منبر پر

جو طور میں موسیٰ نے دیکھا نظر آتا ہے

کاندھوں پہ رسالت  اب شکل میں حیدر کی

آیاتِ الٰہی کا جلوہ نظر آتا ہے

دنیا میں سزا لعنت، عقبیٰ میں سزا دوزخ

حیدر کا عدو کیسا رسوا نظر آتا ہے

سب تیری عنایت ہے سب تیرا کرم مولا

قم والوں میں صائب کا چرچا نظر آتا ہے

۱۹ ستمبر ۲۰۱۶