کلیاتِ صائب جعفری (نظم و نثر)

مصرع ہزار بیت میں یہ  انتخاب ہے

عیدِ غدیر حکمِ رسالت مآب ہے

روشن ہوا ہے جس سے مرا ماہتابِ فکر

عشق علی کا سینہ میں وہ آفتاب ہے

بَلِّغْ کا لحن اب بھی یہ کہتا ہے صاف صاف

اسلام کا غدیر ہی پورا نصاب ہے

مومن ہے شاد منبرِ پالاں کو دیکھ کر

در پیشِ قلبِ شیخ کو اک اضطراب ہے

ایمان کا مآل ہے خلدِ بریں مگر

ایماں بغیر حب علی اک سراب ہے

جس جا وہ جائیں گے وہیں جائے گا یہ غلام

قنبر ہوں تھام رکھی علی کی رکاب ہے

کعبہ کا ہو عدو یا ولایت کا ، ہوگئی

اک کنکری سے دونوں کی مٹی خراب ہے

کترا کے اس سے جو چلا وہ رب سے کٹ گیا

عرفانِ حق کا بس علی مولا ہی باب ہے

جب خوابِ مرتضیٰ کی ہے قیمت رضائے حق

پھر سوچئے کہ جاگنے کا کیا حساب ہے

میثم مزاج صائب آشفتہ سر ہوں میں

ہر زخم جسم پر مرے مثلِ گلاب ہے

۱۴ ذِ ی الحجہ ۱۴۳۸، ۵ ستمبر ۲۰۱۷ قم المقدسہ