کلیاتِ صائب جعفری (نظم و نثر)

 غزل

گر خدا وند کو خدا کرلیں

زندگی موت سے جدا کرلیں

زندہ لاشیں سمجھ نہ پائیں گی

چلئے مردوں سے کچھ گلا کر لیں

غیر کے ساتھ بات دور کی ہے

کاش ہم خود سے ہی وفا کر لیں

حق انسانیت ادا ہو جائے

ایک سجدہ اگر ادا کر لیں

درد کا فلسفہ کھلے گا اگر

روح کو رو بہ کربلا کرلیں

شرط یہ بھی وصال یار کی ہے

آرزووں کو مدعا کر لیں

مر ہی جاوں خوشی کے مارے میں

وہ اگر میرا تذکرہ کر لیں

میں نہ باز آوں گا انا الحق سے

ظلم کی آپ انتہا کر لیں

ان کی راہوں میں بیٹھ کر خود سے

جنگ اک صبر آزما کر لیں

عشق لگتا ہے جرم دنیا کو

آو یہ جرم برملا کر لیں

کاش ہم بھی پئے نماز عشق

وہب کلبی کی اقتداء کر لیں

پھر یہ موقع نصیب ہو کہ نہ ہو

ہے سحر گام کچھ دعا کر لیں

حرف دیں گے نوید فتح و ظفر

چند حرفوں کو جابجا کر لیں

نفرتوں کی گھٹن نہ ہو جس میں

ایسی پیدا کوئی فضا کر لیں

غیب بن جائے گا حضور، حضور

دل کی آنکھوں کو آپ وا کر لیں

اس سے پہلے کہ دم اکھڑ جائے

خود کو صائب سے آشنا کر لیں

۱۸ جنوری ۲۰۱۷