جو لب صبا پہ آیا نئی صبح کا فسانہ

صنعت رد العجز علیٰ الصدر

جو لبِ صبا پہ آیا نئی صبح کا فسانہ
نئی صبح کا فسانہ با نوائے عاشقانہ
با نوائے عاشقانہ جسے گا رہا ہے بلبل
جسے گا رہا ہے بلبل ہے بہار کا ترانہ
ہے بہار کا ترانہ، جو نسیم نغمہ خواں ہے
جو نسیم نغمہ خواں ہے با سرودِ مخفیانہ
با سرودِ مخفیانہ ہے کلی کہیں پہ رقصاں
ہے کلی کہیں پہ رقصاں کہیں غمزے دلبرانہ
کہیں غمزے دلبرانہ کہیں وجد میں طبیعت
کہیں وجد میں طبیعت با جنونِ والہانہ
با جنونِ والہانہ کیا کشف عقل و دل نے
کیا کشف عقل و دل نے نیا رمز عالمانہ
نیا رمز عالمانہ جو قلم تک آن پہنچا
جو قلم تک آن پہنچا مرے شعر جاودانہ
بطفیل نورِ باقر لو.وہ ابھرا شمسِ حکمت
لو وہ ابھرا شمس حکمت ہوا جہل خود فسانہ
تری محنتوں کے باعث تری تن دہی کے صدقہ
ملی حکمتوں کو منزل ملا علم کو ٹھکانہ
تھی وہ تیری ذمہ داری، ترا حوصلہ تھا جس پر
در مصطفیٰ سے آیا وہ سلام صادقانہ
یوں عیاں کیا تھاتو نے روئے علم و آگہی کو
نہ بچا جہالتوں کے لئے کوئی بھی بہانہ
یوں غرورِ فاقہ مستی کو جِلایا تو نے مولا
کہ ہوا دھواں امیروں کا غرورِ ظالمانہ
تری سلطنت کا حصہ ترے دم قدم سے قائم
یہ زمین کا بچھونا یہ فلک کا آشیانہ
تری جانفشانیوں نے یوں بساطِ ظلم الٹی
چلی تاج کی نہ کوئی کبھی چال شاطرانہ
نہ نمود  و نام چاہا، نہ کی خواہشِ حکومت
کیا دین آشکارا، بطریقِ محرمانہ
ہے انہیں گناہ سے نفرت ہمیں لاگ ہے گنہ کی
یہ ہے با خدا تجاہل، پہ نہیں ہے عارفانہ
درِ علم پر پڑے ہیں ترے نام لیوا لیکن
نہ ہے بوئے عالمانہ، نہ ہے خوئے ناصحانہ
یہ فریب، دھوکہ بازی، یہ حسد ، غرور، کینہ
فی زمانہ ہو چلی ہے یہی رسمِ دوستانہ
جو زمانے کی حقیقت ہوئی مجھ پہ آشکارا
تو بحالِ گریہ گویا ہوا قلب خاضعانہ
ترے در پہ آگیا ہوں لئے قلب ، خاشعانہ
کہ نصیبِ دل ہو مولا ترا عشق بے کرانہ
میں ہوں مدح خوانِ باقر تو خدا سے اپنے صائب
میں سوائے قرب مولا، کوئی لونگا محنتانہ؟